Shillong, Oct 6: Amlarem constituency-ni ning•o donggipa chatro chatrirangko gisiko nangbate poraichina didina gita Bristibar salo, dingtang dingtang porikkarango teng•suanggipa sak 300-mangni gita chatro chatrirangna dingtangmancha Amlarem-ni Enowell Hall-o mande ra•pilskaaniko dakangaha.
Ia Academic Award Ceremony-ko Meghalaya a•dokni Education Minister aro jolni MLA Lahkmen Rymbui-ni dilanichi ong•atangaha aro ia tom•anio a•dokni Chief Secretary Donald P Wahlang, DGP LR Bishnoi, Commissioner & Secretary BDR Tiwari aro gipin officer-rangba dongpae bak ra•angaha.
Ia program-ko ong•atanio a•dokni Education Minister Lahkmen Rymbui, jinmana aganprakangengon, bida budina tikkelaniko dontongjachina aro ki•taprangonikosan ong•aigija internet-rangni dakchakanichi a•gilsakni seng•aniko skie ra•china chatro chatrirangko didiangaha.
Meghalaya a•doko bang•a cholrangko nikengani giminsa gipin biaprangoni manderang Meghalaya a•doko kamrangko ka•e cha•na re•batokenga ine janapatengon, ian a•doko kamrangko ka•e cha•na aro sorkariosan ong•aigija gipin kamrangko ka•e cha•na cholrang donganikoba mesokani ong•enga ine Rymbui parakataha.
Ia tom•anio a•dokni Chief Secretary Donald P Wahlang aro DGP LR Bishnoi-ba jinmana aganprakengon, pekatgipa bosturangoni chel•e dongchina aro an•tangtangni miksonganirangko chu•sokatna man•na gita gisiko nange poraichina chatro chatrirangko didiangaha.
