Shillong, July 16: Meghalaya a·dokni power department-o, mongsongbate MeECL aro Saubhagya scheme-ko ra·e kamrang tik ong·gijani gimin matnanganirangko jakgitele sandirokatna gita sorkarini tik ka·anganiko Meghalaya Democratic Alliance (MDA) sorkari baksa bakrimenggipa gimikan namnike ra·chaktokaha.
Power department-o ong·enggipa mamlani gimin mikkangchi dingtang ja·kuko de·angna skangba jakgitele sandirokatao man·ani report-ko sengchengkuna gita MDA sorkari baksa bakrimenggipa dolrangni padotrang, Sukrobar salo a·dokni skotong minister Pa Conrad K. Sangma-ni tom·dilanggipao tik ka·grikangtokaha.
Tom·ao, mongsongbate bijolini gimin, Assam aro Meghalaya-ni sima-arini gimin, Social Welfare aro gipin nangarangni giminba chanchirimjolaha.
Tom·a matchotani ja·man koborna aganengon, tom·ao pilak chanchianirangko ua chu·ongnikaha aro kusiba ong·a ine agane, bijolini mamlani bidingo sandirokatani report-ko sengchengkuna gita uamang tik ka·grikaha ine BJP dolni State Chief, Pa Ernest Mawrie talataha.
Unomiting, HSPDP doni skotong dilgipa Pa KP Pangniang-ba apsandakgipa kattako aganengon, kajia-golmal gnanggipa Assam aro Meghalaya-ni sima-arini giminba uamang tom·ao chanchijolaha ine talataha. Bakrimenggipa gimik dolni apsan asonge
chanchirimanganiko uaba namen chu·ongnikaha aro apsandaken bijolini bidingo jakgitele sandirokatani report-ko senge nikuna gita jinmaan tik ka·angaha ineba ua agandapataha.
Gipin bakrimenggipa dolrang jekai PDF, NCP aro adita sak independent MLA-rangba apsandakgipa kattakon aganangtokaha.
