Shillong, Oct 27: Goa-o ong•atenggipa Power Lifting National Competition-o bakko ra•epana man•na gita Meghalaya Power Lifting & Fitness Association (MPLFA)-ba kal•susagiparangna tangka paisani gita dakchakanirangko on•china mol•molataha. Ia MPLFA-ba Power Lifting India-ni bak ong•pae, ia Power Lifting kal•susaanio gisik nanggipa chadamberangko National Competition-o bak ra•atpana miksongengachim.
MPLFA-ni u•iatani gitade, da•o gnigipa changna uamang kal•susagiparangko Goa-o ong•atenggipa National Competition-ona watatahachim indiba changgnion uamang sorkarioniko tangka paisani gita maming dakchakanirangko man•jaha aro kal•susaenggipa manderangna kal•susagipa manderangni nokdangrang aro association-ni membor-rangsa dakchakanirangko on•aiahachim.
Iani bidingo Budbar salo MPLFA-ni membor-rang, a•dokni Chief Minister-na memorandum-ko on•enba, tangka paisani gita dakchakanirangko on•china didiataha.
Ia national competition-o bakko ra•enggipa chadamberangara, ia bilsini a•bachengachibara district competition-o seokako man•gipa dingtang dingtang a•jani chadamberangan ong•achim ineba association parakataha.
