Shillong, April 1: NPP dol baksa bakrime sorkariko rikenggipa doloni adita meligrikgijanirang ong·katengon, mongsongbate Power Minister-ni bijolini a·bako jako ra·e nirokatani bidingo UDP dolni dilgiparangni uko kamoniko ra·galchina dabianirang ong·engon, Home minister Pa Lakhmen Ryumbui mangmangsan Pa James Sangma-na chakstape ku·rangko on·paenggipa saksa ong·a.
“Power minister-ko ra·galani gimin aganode, ia pilakan skotong minister-osa pangchaka indiba chingni gitade jinma tom·e chanchirima dongkujani gimin da·odipet uko ra·galanio maming dabianirangko daka dongkuja ine Pa Rymbui aganangtaiaha.
“Ia mamlani gimin dolni gita grongrime agan-chanchigrikaniko dakkuja dipetde an·tangni aganatangon anga da·oba kim·kim ong·enga,” ine ua aganangkuaha.
Indakeba janapjolna gita man·gen je, a·doko sorkariko rikenggipao NPP baksa bakrimenggipa UDP dolni dilgiparang adita salrangna skang Pa James Sangma-ko kamoniko ra·galchina gita a·dokni skotong ministerko didiangaha.
A·dokni bijolini mamlako ra·e da·omiting dilgiparangni gisepo dingtang dingtang agananirangko nikna man·enganiara UDP dolni ning·aon adita meligrikgijanirang donganiko mesokenga ine nikatna man·gen.
