Shillong, July 6: BJP dolchi rikenggipa Sorkari NDA-ni President-na susaana seokgimin Ma Droupadi Murmu, re·baenggipa July 18-o puonsusaanio chakpaaniko on·china mol·molna gita Meghalaya a·dokonaba sokbaaha.

Ma Murmu jean Jharkhand-ni Governor gitcham ong·achim, Shillong-ni Orchid Lake Resort-o a·doko sorkari rikenggipa MDA-ni Minister, MLA aro MP-rangko gronge chakpaaniko on·china agangrikaniko dakaha.

Ma Murmu baksa Union Minister for Ports, Shipping and Waterways Minister Pa Sarbananda Sonowal, Minister of State for Social Justice and Empowerment Ma Pratima Bhowmik, Assam-ni MP Rajdeep Roy aro BJP dolni aganchalaitimgipa Pa Sambit Patra apsan re·baaha.

Meghalaya a·dokni skotong Minister Pa Conrad K Sangma aro Speaker Pa Metbah Lyngdoh aro gipin cabinet Minister-rang rimchaksoaniko dakaha.