Shillong, Aug 7: COVID-19 man·e sanna bananirangko ra·anio a·dokni manderang, tangka paisani gita neng·nikanirangko chagrongna nangengani gimin private hospital-rango COVID-ko sanna gita Meghalaya sorkari, dingtangmancha damrangko tik ka·e on·angaha.
Meghalaya a·dokni Health Minister Prestone Tynsong-ni u·iatani gitade, health official-rangni agan-ku·pattie on·aniko man·ani ja·man a·dok sorkari, private hospital-rango COVID-ko sannani damrangko tik ka·e on·na manchiangaha aro ia korosrangko MHIS-ni ning·o man·anggen.
Private hospital-rango COVID-ko sannani damrangara indake ong·anggen, chong·motan general ward-o oxygen gri sanna gita salprako gong 7000/-, general ward-o oxygen gnang sannani salprako gong 11,500/-, ICU HDU ventilator gri salprako gong 14,000/-, ICU Non-Invasive Ventilation-na salprako gong 18,000/- aro ICU Invasive Ventilation gnang salprako gong 20,000/- ka·e ong·gen ine Health Minister parakataha.
Ia damrangko August 15 tarik dipet ja·rikanggen ineba Tynsong parakataha.
Indake ong·engon, mission aro private hospital-rangna ICU oxygen plant-rangko on·dape dakchakanirangko on·na gitaba sorkari tik ka·angaha ine Health Minister u·iataha.
Tikako su·e ra·anichisan COVID-ko warachakani chol ong·enga ineba ua a·doko songdongenggipa manderangko, tika su·e ra·china gita didiataha.
Koborko on·ani gitade, da·o dipet Meghalaya a·doko COVID tikako su·giparang 45 percent-san ong·engpiti.
