Tura, Sep 21: Meghalaya a•dokona wakrangko gipin a•dokrangonikosa ra•bana nangengani gimin a•dok sorkari, ‘Progress’ ine mingskagipa Rural Backyard Piggery Scheme aro Piggery Mission-ko ra•gataha aro ia scheme-rangchi a•doko wak be•en chu•onggijaniko namatna man•gen ine Budbar salo, Meghalaya a•dokni Chief Minister Conrad K Sangma parakataha.
Chief Minister-ni parakatani gitade, bilsiantian a•doko metric ton 18,000-mangni gita wak be•enko manderang cha•enga aro iana bilsio gong crore 630-mang koros ong•na nangengachim.
Meghalaya a•doko man•enggipa wak be•enrangoni 50 percent-kode gipin a•dokrangonikosa ra•baenga aro ian gong kror 315-mang ong•skaenga ineba ua aganaha.
Iandake a•doko wak be•enrang chu•ongjae bang•en tangka paisarangko koros ka•na nangengani gimin sorkari, a•doko wak be•en chu•onggijaniko namatna gita ‘Progress’ scheme-ko a•bachengataha ine Sangma parakataha.
Piggery Mission-ko dingtang dingtang cooperative society-rangni ning•o a•bachengatenga ine janapatengon, ia program-ko an•tangtangni namgnina jakkalchina ua manderangko didiangaha.
Gipin a•dokrango pangchakna nangjana gita a•dok sorkari, goatery, piggery, fishery aro uandakgipa dingtang dingtang mission-rangko ra•gatenga ineba Chief Minister parakataha.
