Shillong, Feb 1: Nomination file ka·ani gnigipa sal, chong·motan Budbar salo, Pynthorumkhrah constituency-ni National People’s Party (NPP) candidate Rocky Hek-ba an·tangni nomination-ko file ka·angaha.

Pynthorumkhrah constituency-ni changbongana MLA ong·enggipa Alexander Laloo Hek-ni gritang Rocky Hek baksana uni nokdangni manderang aro una chakpaenggipa manderangba uni nomination file ka·eani somoio dongpaaha.

Nomination-ko file ka·angani ja·man kobor ra·timgipa manderang baksa agangrikengon, Pynthorumkhrah constituency-ni manderang dingtanganiko nangniktokengani gimin ua chegipa ong·na ka·dongenga ine Rocky parakataha.

Rocky Hek-ni aganani gitade, Pynthorumkhrah constituency-o indita bilsirangna maming namroro silroroanirang dongjaha aro chadamberangba kamrangko ka·e cha·na cholrangko man·jaengani gimin pekatgipa samrangko jakkaltokengachim.

Ia election-o ua seokako man·genchimode skanggipa ua chadamberangni iandake pekatgipa sam jakkalaniko champengna kamko ka·chenggen ineba Rocky parakataha.

Manderangna gong 500 ba gong 1000 tangkarangko on·ani pal ua manderangni janggi tangani gadangko namdapatnasa kamko ka·gen ineba ua aganaha.