Shillong, Feb 8: Raksamgreni MLA gitcham aro gitcham congress dilgipa Limison D Sangma, skotong ministerni dongpaanio NPP office Lower Lachumiereo una chakpagiparang baksa NPP dolo napangaha.
Limison Sangmani NPP dolo napanichi, A•chik a•songo NPP dolko bilakdapatna kam ka•anio dakchakani ong•gnok, NPP dol Meghalaya a•dokni namroro-silroroanina bimchipen kam ka•enga aro re•baenggipa 2023 bilsini pu•onsusaaninaba namen kam ka•soengaha ine skotong minister Conrad Sangma aganaha. Assam aro Meghalaya sima-arini golmalrangko namatnaba sorkari bimchipen kam ka•engaha ineba ua aganjolaha.
Limison Sangma, NPP dolo bakrimapae aganengon, Conrad Sangmani dilanio Meghalaya a•dokko nambata gadangona ra•dona man•gen aro NPP baksa jak on•pae dolko namdapatna aro a•dokni silroro-namroroaniba kam ka•pagen ine aganpaaha.
