Shillong, Feb 7: Tetelia-Byrnihat rel ramako taribana on•anide songko nokko dilgiparangni jakosa ong•aia aro uamang jeko nangnika ukon district council-de ra•chakaigen ine Sombar salo Khasi Hills Autonomous District Council (KHADC)-ni chief executive membor (CEM) Titosstarwell Chyne parakataha.
Chyne-ni parakatani gitade, a•dokni a•arangko kangna gita district council-de bil dongja aro a•arang pilakan a•king nokmarangni jakosa ong•ani gimin iandakgipa kamrangko chanchianide songko nokko dilgiparangni jakosa ong•aia.
“Songko nokko dilgiparangan rel ramarangko taribana nangnikjaenga ong•ode chinga iako dakdrana bil dongja,” ine Chyne aganaha.
Iani bidingo songni nokni dilgiparang ta•raken sorkarina aganchakaniko on•skana nangenga ineba ua aganaha.
Indake ong•engon, Khasi Hills-ona rel ramako tarianiara skangonin matchotchipgija dongengani gimin ian altua kam ong•jawa indiba sorkari, iani bidingo District Council baksa agangrikenga ine Meghalaya a•dokni Chief Minister Conrad K Sangma parakatskaaha.
Dingtang dingtang dolrang aro jolo songdongenggipa manderang baksa apsan chanchirime ia neng•nikaniko namatna ka•dongenga ineba Chief Minister parakataha.
