Shillong, February 7: March 7 tariko PHE-ni Minister Incharge Pa Renikton Lyngdoh Tongkhar, Jal Jeevan Mission-ni ning⋅o kam ka⋅anirang tarakenganiko nike somoi gitan matchotatna ka⋅dongsoani kattako parakataha.
All India Trinamool Congress-ni Rangsakona MLA Pa Zenith Sangma-ni JJM-o jakkalgipa pipe-rangara HDPE-nisa jean dam komiani indiba maina dam rakani GI pipe-ko jakkalja ine sing⋅doon, Mission-ni ning⋅o HDPE pipe-kon a⋅song gimikam jakkalenga aro baianiko tosusae nigenchimoba HDPE pipe-de bilsi 50-na baigen indiba GI pipe-de bilsi 15-onasan baia ine Pa Tongkhar aganchakaha.
North Garo Hills-ni ning⋅o song 531-rangonade chi sale on⋅ani sokaha jean JJM-ni chu⋅sokani 28.43% mang ong⋅enga ine Minister ui⋅atahachim.
Pa Marthon Sangma-ni janapani gita, contractor saksanan 6 ba 7 project-rangko on⋅anichi kamrangko somoi gita matchotna man⋅jaenga. Unigimin sorkari contractor-rangni kamrangko nirokna nanga ine mol⋅molanina, JJM-de Village Water Sanitation Committee-ni see jote on⋅gimino pangchakesa kamkode on⋅enga ine Minister aganchakaha.
