Shillong, May 25: Da•o dipet Meghalaya a•dokni Reservation policy-o Khasi-Jaintia-rangna 40 percent, Garorangna 40 percent aro gipin Tribal jatrangna 5 percent-ko done, gimik 85 percent-ko man•engani gimin ia reservation policy-ko gital dake nipiltaichina Voice of the People’s Party (VPP)-ni dabienganiara wa•alko kal•e roa gitasa ong•enga maina Supreme Court-ni raio pangchake a•dokni reservation policy-ko nipiltaina nanggenchimode mikkangchi a•dokni chadamberangnan dal•bea gimaani ong•gen ine Bristibar salo, Meghalaya a•dokni Education Minister Rakkam A Sangma, mikrakataniko on•angaha.
Reservation policy-ko gital dake nipiltaichina dabienba, VPP-ni president Ardent Miller Basaiawmoit aro gipin dilgiparang, Main Secretariat mikkango okumu chake jingjengatengachim ine nikna man•a.
2014 bilsio Maharashtra a•doko ong•gipa obostani gimin toe janapatengon, ua somoio badiaba jatna 50 percent bate seat-rangko chamani bidingo sorkarini pass ka•gipa ordinance-ni kosako Supreme Court-na badi ka•aha aro uni ja•man Supreme Court, ordinance-ko den•galenba Meghalaya a•dokko man•chape a•songni pilak a•dokrangon biap kanganiko 50 percent-na batjachina gita raiko on•ataha ine Education Minister parakataha.
Meghalaya a•doko Tribal-rang 85 percent reservation-ko man•enga ine janapatengon, dingtang dingtang a•dokrangoniko iani bidingo Supreme Court, aganchakaniko bi•aton, Tribal-rangna 85 percent reservation donga ine Meghalaya sorkari, 2021 bilsini March 27 tariko aganchakaniko on•ataha indiba da•o dipet Supreme Court, iani bidingo raiko on•kujaenga ine Sangma parakataha.
Meghalaya a•doko Tribal-rangna 85 percent reservation-ko Supreme Court den•galna nanggenchimode mikkang chasongni manderang, ia chasongni manderangko kema ka•na man•jawaha ineba Sangma mikrakataniko on•angaha.
