Shillong, January 27: Meghalaya a•dokni jatgittam manderangna on•gimin reservation policyko nipile kam ka•jaengani gimin, agricultureni chatro-chatrirang sorkarini kosako jegalna ine January 29 tariko signature campaign ko ong•atangna tik ka•angaha. Kobor ra•timgiparangna aganengon, ia jegalaniko Shillongni Mawkhar gari station-o ong•atanggen, jeonan NGOrangko aro dingtang dingtang jatrangkoba tom•ao dongpachina mol•molangaha ine Barry Pyngrope aganaha. “ Angni dabianide, Meghalayani jatgittamnan reservation policyko apsan apsan on•a nanga maina, da•omitingo Khasi aro Jaintia jatgnina 40%kosan on•aenga, Garorangnade jatsanamangmang 40% ko on•skaenga.
Khasinaba 40%, Jaintianaba 40% aro Garonaba 40% ko on•a nangachim, Indiba chinga Khasi aro Jaintiade 20-20% kosan man•paenga, unigimin gimik jatnan apsan suale on•a nanga” ine Pyngrope aganaha.
Iako jegalenganiara jatsa jatgipinko gisik sagrikatna ong•jaenga, indiba ian sorkarini kosako, uamangni nirokjaenganina jegalanisan ong•aia ine Sam Higginbottom University of Agriculture, Technology and Sciences, Allahabadni chatro-chatrirangba chakpaataha.
Bang•a A•chik chatro-chatrirangba iana chakpaenga, aro tom•ao dongpagen ineba ua janapangaha. Skangode Khasi-Jaintia aro A•chikrangni jelaniara inditana kingking ong•kujachim, Khasi-Jaintiarangba inditanade jelkujachim, unigiminsa dilgiparanga Khasia aro Jaintia jatgnina dingtang reservationko nangjawa ine ra•chakaha, indioba da•o mande jelaniko nigrike iako tik ka•griknade nangengjokchim ineba Pyngrope agankuaha.
Sorkarini kam ka•enganirangko anga mande ra•a indiba A•chikrangde jatsamangmangan 40% reservation policyko man•enga, indiba chingade jatgni 40%ko sualgrikna nangskaenga, ian apsangrik suale on•anio kraani ong•jaenga, mikkangchi mairangko chinga ja•ku ga•angkuna nanggen iarangni gimin chingna aga-ku•pattichina KHNAMni dilgipa Adelberth Nongrumkoba chinga gronggen ineba ua agandapaha.
