Nongpoh, Mar 24: Ri Bhoi a·jani Nongtyrlaw songo Jal Jeevan Mission (JJM)-ni gong lak 2.43 ong·gipa Combined Water Supply Scheme-ko songni manderangna a·bachengate on ·angaha.

Ia water supply scheme-ko Nongpoh-ni MLA Mayralborn Syiem a·bachengate on·angaha aro ia scheme-ko a·bachengate on·anganio MDC Balajied Rani, PHE Nongpoh Division-ni SE Eugene Lamare, dingtang dingtang officer-rang aro songni manderangba bakko ra·angaha.

Ia Combined Water Supply Scheme-ko a·bachengate on·angani somoio Nongpoh-ni MLA jinmana aganprakengon, Jal Jeevan Mission-ni ning·o songni nokni manderangna ringani chirangko sokate on·na rakbee kamrangko ka·engani gimin PHE department-ni officer-rangko aro gipin kam ka·giparangkoba mittelpilangaha.

Mikkangchi ringani china diljana gita samtangtango donggipa buring bolgrimrangko tange rakkichina gitaba ua jolo songdongenggipa manderangko didiangaha.