Shillong, Apr 19: Ri Bhoi a•jao namroro silroroaniko ra•bana gita ra•gate ka•enggipa dingtang dingtang kamrangko Sombar salo, Union Law & Justice Minister Kiren Rijiju nieaha aro a•jani songadam nokadamrangonaba re•ange dingtang dingtang kamrangko niangjolaha.
Rijiju-ni Ri Bhoi a•jaona re•angani somoio dingtangmancha tom•aniko Nongpoh-o donggipa DC office-o ong•atangaha, jeon Ri Bhoi a•jani Additional Deputy Commissioner MB Tongper, a•jao ra•gate ka•enggipa kamrangni gimin una agan-talate on•angaha. Ia tom•anio Meghalaya sorkarini ning•o donggipa Planning department-ni Secretary Dr Joram Beda, Deputy Commissioner Arpit Upadhyay, SP Giri Prasad aro gipin official-rangba dongpae bak ra•angaha.
Ia tom•anio Union Minister Kiren Rijiju, Meghalaya a•dokni official-rangna aganprakengon, Aspirational District program-ni gimin talataniko on•angenba, ia program-ni miksonganiara India a•song gimiko ta•rake aro name dam 112 Aspirational District-rangko ong•atna miksonganian ong•enga ine parakataha.
Rijiju-ni parakatani gitade, a•songni Aspirational District-rangko, a•jao an•seng baljokani, lekka porani, gama ge•ani, nokrangko rikani, jakni kamrangko nambatatani aro uandakgipa dingtang dingtang kamrangko nie gadangko on•anggen.
