Shillong, Sep 30: Sukrobar salo, India sorkarini Rural Development aro Steel-ni Union Minister of State Faggan Singh Kulaste, Ri Bhoi a•jaona re•baenba, Aspirational District Program (ADP)-ni bidingo a•jani official-rang baksa Nongpoh-o donggipa DC office-ni Conference Hall-o tom•e chanchirimangaha.
Ia tom•anio Ri Bhoi a•jani Deputy Commissioner Arpit Upadhaya aro a•jani dingtang dingtang officer-rangba dongpae bak ra•angaha aro tom•anio Ri Bhoi a•jani Byrnihat jolo namroro silroroaniko ra•bana kam ka•anirangko nipilangaha.
Ia tom•anio dingtang dingtang department, jekai Health & Nutrition, Education, Agriculture, Horticulture, Veterinary, Rural Development aro uandakgipa department-rangni Aspirational District Program-ni ning•o kam ka•anirangko Ri Bhoi a•jani Deputy Commissioner, ma•mongni Union Minister of State-na agan-talate on•angaha.
Tom•a matchotani ja•mano kobor ra•timgipa manderang baksa agangrikengon, ADP-ni ning•o kam ka•enggipa dingtang dingtang kamrangni gimin ma•sie ra•na gita ua Ri Bhoi a•jaona re•baaha ine Union Minister of State Faggan Singh Kulaste, talataniko on•angenba, ia program-ni ning•o Horticulture, Education aro PHE department-ni kamrangna gisik on•batna nangenga ine parakataha.
Ja•mano ua Nongpoh Circuit House-onaba re•ange, jolni dilgiparang baksa tom•e chanchirimangaha aro uni ja•man, Byrnhat PHC, Anganwadi centre aro Byrnihat-o donggipa Moonlight Secondary School-koba niangaha.
