Shillong, Apr 29: Ri Bhoi a•jako man•chape Khanapara aro Jorabat jolrango Casino ba joa kal•chakgipa biaprangko jegale, Sukrobar salo Hynniewtrep Integrated Territorial Organisation (HITO), a•dokni Chief Minister Conrad K Sangma-na sedoataha.
Ri Bhoi a•jako man•chape Khanapara aro Jorabat jolrango joa kal•chakgipa biaprangko kulianiara Meghalaya a•dokni songsalna namgijako ra•baani gita ong•gen ine HITO parakataha.
HITO central body-ni president Donbok Dkhar-ni parakatani gitade, Meghalaya a•doko joa kal•aniko aro mongsongbate internet gita joa kal•aniko niamo ong•ataniara Meghalaya a•doko songdongenggipa manderangni bewalko namgijaona ra•angani gita ong•gen.
Meghalaya sorkarini ra•gatgipa Meghalaya Regulation of Gaming Act 2021-ko salsnini gisepon den•galpilchina dabiangengon, ia niamko on•gimin somoi gita den•galpiljagenchimode uamang jinma jegalanirangko dakanggen ine HITO-ni president, mikrakataniko on•angaha.
