Shillong, Jan 5: Meghalaya sorkarini proposal on•gimin gita Ri Bhoi a•jani Kyrdemkulai-o Central Agriculture University (CAU)-ko kulichina dabie Bristibar salo, Union Agriculture & Farmers Welfare Minister-ni Kyrdemkulai-o donggipa Agriculture College aro Umiam-o donggipa ICAR-ona re•baanio, Khasi Students Union (KSU)-ni membor-rang, jingjengataniko dakangaha.
Bristibar salo, Union Agriculture & Farmers Minister Narendra Singh Tomar, Kyrdemkulai-o donggipa Agriculture College-ni administrative unit aro academic block-ko nokdonggae on•na aro Umiam-o donggipa ICAR-o North East Krishi Kumbh-ko a•bachengate on•angan baksana ICAR-ni chang 49-gipa foundation day-ko manianio bak ra•na re•baahachim ine nikna man•a.
Indake ong•genchimoba Union Minister-ni re•baani somoio KSU-ni membor-rang, ua biapo dongsoenba, Kyrdemkulai-o kuligipa Agriculture College-ni pal Central Agriculture University-ko kulie on•china dabie jingjengattokskaaha.
KSU-ni parakatani gitade, Meghalaya a•doko central agricultural university-ko kulina gitasa 2010 bilsion ma•mong sorkari proposal-ko on•ahachim indiba ja•mano university-ni pal ma•mong sorkari, agriculture college-kosa kulie on•ahani gimin iako KSU raken jegalengachim.
