Shillong, Mar 10: Ri Bhoi a•jani Narang songo donggipa ramako black topping on•kujaengani a•sel sambao donggipa manderang a•dimu cha•ketna nangtokengani gimin ia ramako ta•raken tarichina aro black topping on•china dabie Bristibar salo, Paham Mawlein aro Narang jolo songdongenggipa manderang, skulo skigiparang aro HNYF dolni membor-rang, Narang weigh bridge-ona dakanggipa ramako champenge jingjengatangaha.

Iandake ramako champenge jingjengatani a•sel gari gorarang re•rurana man•jae ua biapo jachange dongtokna gita nangaha.

HNYF-ni president Marcus Marten-ni parakatani gitade, ia kilometre 1 ong•gipa ramako tarichipgija donengani a•sel, songni nokni manderangsan ong•aigija ia ramani sambao donggipa skulni bi•sarangba a•dimu cha•ketna gita nangtokenga aro ian bi•sarangna namgijaniko ra•baani gita ong•enga.

Ja•mano Ri Bhoi a•jani district administration, jingjengatenggipa manderangko dontongchina mol•moleaha aro ia ramako sal 10-ni gisepon tarie on•na ku•rachakangaha.

Indake ong•engon, ia ramako tarikujaskalde uamang jingjengataniko dontongjawa ine songni manderang, mikrakataniko on•angskaaha.