Nongpoh, June 24: Bristibar salni 12:00 bajimango, Ri Bhoi a•jani Amjok Byrnihat jolo, ma•sina man•gijagipa manderang, 220 CC Pulsar bike-o re•bae mande saksako dakait dakna jotton ka•ahachim indiba rasong gnange ia mande, an•tangni ra•bitgipa jolonggako jokatna man•aha.
Koborko on•ani gitade, Bristibar salo, Sahil Jaman Passah minggipa mande, Amjok Byrnihat-o donggipa State Bank of India (SBI)-oniko tangka oke noktangona re•angpilengachim aro ua somoio rang•gitik mande sakgni, bike bolsao re•baenba, uni tangka chipe ra•bitgipa jolonggako ra•seke katna jotton ka•ahachim. Indake ong•genchimoba, ia manderang uni jolonggako ra•sekna man•jaha aro joljol ua biaponi bike sale kataha.
Ia a•sel ong•ani ja•mano, ua mande, dos dakgipa manderangko rikna jotton ka•aha aro uni ripeng saksani dakchakanichi ia manderangni sale katgipa bike-ko Byrnihat-ni 15 Mile-o rim•na man•aha. Bike-ko rim•ani ja•mano dos dakgipa mande saksakode jolni manderang rim•rikna man•aha indiba saksade, gipin manderangni dakchakanichi ua biaponi kate jokangna man•aha.
Rim•a man•gipa mandeko ja•mano jolni manderang, Byrnihat police outpost-na pakwate on•ataha aro uamangni dakait dakna jakkalgipa AS-13M 9065 pulsar bike-koba police-rang rim•aha.
