Shillong, Dec 19: Ri-Bhoi a·jani Sohlait Thymmai minggipa songoniko mingsa misilgipa koborko ja·manchake man·soani gita, a·bao jamdap rikgipako wa·al kamanichi mande saksa kamchapa man·e siangaha.

Wa·al kamchapa man·e sianggipa mandeko saksa bilsi 30 ong·gipa Braveman Khongjoh ine ma·sina man·aha aro ua unomiting, Sohlait Thymmai-ni buringo donggipa a·batango kamko ka·engachim ine koboro janapataha.

Ia a·selni bidingo sianggipani pagipa Ale Khongjoh-ni koborna agan-talatani gitade, uni depante mija Sonibar salpaksachibara a·batango kam ka·na re·angaha aro salgipino nokona pil·bapilani ong·achim, indiba uni noktangona sokbapiljahani gimin nokni manderang unbaksa golpoatna jotton ka·genchimoba uni mobile switch off ong·ani gimin man·chipjaha, jeni ja·man, uamang a·bachina re·ange uko sandiangon jamdapko wa·al kamchonakosa niketokaha aro jeon sianggipa mande neng·take dongengachim ukoba manggittangan wa·al kamchapaha ine aganataha.

Indake ong·engon, ia obosta ong·ani bidingo koborko segatmitingode a·sel ong·ani ja·pangko ma·sina man·kujaengachim, unbaksana, Sohlait Thymmai-ni songni-nokni dilgiparang aro police-ba a·sel-obosta ong·gipa biapona soketokkujachim.