Tura, July 30: Garo Hills-o ro·ong salruragipa truck garirangni skatang salengani a·sel Sukrobar pringo bilsi 6 ong·gipa bi·sa saksa aro uni pagipa janggitangtangko gimaatna nangaha.
Sukrobar pringo, South West Garo Hills a·jani Ampati gita ro·ong salangenggipa truck gari bolsa, Ampati Bolsalgre songo, scooty-o re·angenggipa paningsa sakgniko saldapeaha aro uandaken rasong gribee paningsa sakgnian siangna gita nangaha.
Ia a·sel ong·anio so·otako man·gipa mandeara bilsi 39 ong·gipa Tenganbil M Marak aro uni bilsi 6 ong·kuenggipa depante ong·achim aro ua somoio uamang paningsa cha·ani bree noktangona re·angpilengachim.
Uamangni nokona dakanggipa ramako re·angna skangmangmang rang·gitik ro·ong salgipa truck gari bolsa ta·rakbee re·baenba, uamangni scooty-ko salchepeaha aro uamang paningsa sakgnikon truck gari saldapea gita dake uamang sakgnian ua biapo sikamaha.
Ia truck garini registration nombor-ara ML-09A 4135 ong·achim aro a·sel ong·ani ja·man truck garini driver, ua biaponi kate jokna jotton ka·ahachim. Indake ong·genchimoba, a·sel ong·aniko mikrontangchi nikrikgipa mande, bakan ia truck garini driver-ko rikangaha aro ja·mano a·palo kam ka·soenggipa manderang baksa ia mandeko change rim·na man·aha ine kobor on·timgiparang parakataha.
Da·o ia truck garini driver-ko police-rang rim·e, ia a·selni bidingo ning·tue am·sandienga ineba kobor on·aha.
South West Garo Hills a·ja gita ro·ong salgipa truck garirang skatang salruraengani a·sel manderangna kenchakna nangani aro ramarangba nosto ong·atako man·engani gimin ia rama gita ro·ong salruraaniko champengatchina batanggimin bilsirangonin dingtang dingtang dolrang dabitokengachim ine nikna man·a.
