Tura, Mar 17: Bristibar walo, East Garo Hills a•jani Rongjeng bazar-ko wa•al kamanichi, ia bazar-o donggipa merong dokkan ge•gni aro ma•manti bosturangko palgipa dokkan ge•briko man•chape gimik dam 10 dokkanrangko chu•gimik kamchapaha.

Ia dokkanrangko chu•gimik wa•al kamchapahani a•sel komibeoba gong lak 20 hajal 70-mangni gita bosturang chu•gimik nisigalako man•aha.

Koborko on•ani gitade, Rongjeng bazar-ko wa•al kamenga ine Sukrobar pringwalni 2:17 bajimango Rongjeng samba jolo donggipa Rongmil outpost-ni police-rang, manderangni phone ka•e u•iataniko man•soaha aro bakan wa•al kimitgipa garirang, ua biapona dariangenba, Rongjeng bazar-ni gipin bakrangona wa•al giprorogniko champengena man•aha.

Indake ong•genchimoba, rasong gribee ua biapo donggipa dam 10 dokkanrangkode wa•al kamsomanahachim.

Da•o dipet, Rongjeng bazar-o wa•al kamchakatani a•selko tale ma•sikujaenga aro police-rang iani bidingo am•sandianirangko dakenga ine u•iataha.