Williamnagar, Feb 1: Non-Lapsable Centre Pool of Resources (NLCPR) scheme-ni ning·o tarina on·gipa Rongjeng-Mangsang-Adokgre ramako somoi gita tarijaha ine matnangenba, ia ramako tarina contract-ko man·gipa CCL International Limited Corporate-na Williamnagar-ni Niksamso Garo Community Organisation (NGCO) baksana East Garo Hills-ni adita sak ukilrang, legal notice-ko on·angaha.

Legal notice-ko on·gipa ukilrangni parakatani gitade, ia ramako tarina gita gong crore 210-ko chamatenba, kamko 2017 bilsini October 26 tarikon CCL company-na on·ahachim aro ia kamko matchotna gita ja 24 somoiko on·ahachim.

Ia ramako tarina gita on·gipa work order-o ia ramako tarian baksana Ildek chibimako dolong kabatna gitaba ge·etaniko on·ahachim ine ukilrang parakataha.

Indake ong·genchimoba ia Rongjeng-Mangsang-Adokgre ramako matchotna gita on·gimin somoi, chong·motan 2019 bilsini October 26 tarikonaba kamrangko matchotjahani gimin NGCO baksana East Garo Hills a·jani adita ukilrang, ia CCL company-na legal notice-ko on·ataha ine u·iataha.