Shillong, Nov 6: Meghalaya sorkari, da·o South West Khasi Hills district-ni Nongbah-Jynrin jolo rong·mesak jolsolgipako dim·penggipa tank-oni jokenganiko sandiate porikka ka·e nichina gita North Eastern Hills University (NEHU) aro IIT-Guwahati-ko aganaha ine a·dokni skotong minister Pa Conrad K. Sangma u·iataha.
Sandiate porikka ka·aniko dakchina sorkarini mol·molataniko da·odipet, NEHU-oni knachakaha, indake ong·oba IIT-Guwahati-oni maming aganchakata dongkuja, indiba ka·donga, ru·utgijan uamangoniko aganchakaniko man·sogen, ine skotong minister Pa Sangma Bristibar salo koborna aganaha.
Janapgimin tank-oni joksolenggipako sandiate uko porikka ka·ani ja·man report-ko sokatna gita NEHU-na adita anti somairangko on·aha. Sorkari ua report-rangko nianggen aro maibakai ge·gni report-rango dingtanggrikani dongode dolgipinni dakchakaniko am·angskagen ineba skotong minister talataha.
“Report-ko on·taigipaoba maioba dingtanggrikani dongkuode chinga iani gimin chanchirime tik ka·anggen. A·dokni manderangni naljokanina chinga chol donga kakket namgipa ja·kurangko de·anggen,” ineba ua aganaha.
A·gilsak gimikchina giprorogipa sabisini a·sel gipinoni organisation-rangna ianona re·bana gita altua ong·jawa, uni gimin jakgitelgipa dolgni institute-rangko chinga baseaha ine Sangma aganaha.
Indake nikatna man·gen, Jharkhand aro Andhra Pradesh-ni ja·man, 9.22 million tone-rang gnang baksa Meghalaya a·dokan a·songo rong·mesak bang·gipa biaprangonide gittamgipa ong·enga.
