Williamnagar, September 4: Samanda Block ni ning·ao donggipa Rongsak songko jokpakgipa Simsang chibimako kabatgipa Submersible Bridge ba dolong-ko, Meghalaya Government-ni Chief Whip aro Williamnagar ni MLA Marcuise N. Marak, Samanda Block ni BDO gitcham aro gital Project Director Albert G. Momin, Samanda ni BDO gital, Tochri R. Sangma, sorkarini officer-rang aro songni nokni manderangni mikkang-o, Meghalaya a·dokni Chief Minister-ni Advisor Thomas A. Sangma., September 3 tariko oprake on·angaha.
Ia dolongko Convergent Project ni ning·ao rikaha. Iako rikna gita tangka gong crore 1 lak 32-ko chamaha, jenan, song dam 13-ni VEC-rang nangrime MGNREGS-niko tangka gong crore 1 lak 7 chamaha, IBDLP lak 15 ko chamaha aro SRWP tangka gong lak 10 ko chamaha.
Ia tom·anio rimchaksoani kattarangko Samanda Block-ni BDO gitcham aro gital Project Director Albert G. Momin agane, Williamnagar ni MLA Marcuise N. Marak-ko ia dolongko rikna gita pilak dakchakanirangko on·anina mittelange, songni nokni manderangko ia dolongko nirokna committee rangko songe mikkangchi name nirokangchina didiani kattarangko aganaha.
Song dam 13 ni Convergent Project ni Secretary, an·tangni kusi ong·aniko parake, ia dolongko chu·soke matchotatna pilak on·gilgiparangko mittelangaha.
Samanda Block ni gital BDO, Tochri R. Sangma sokbagipa sakantina uni sorkario kam ka·ani ru·utgijaniko jinmana parake, Williamnagar ni MLA Marcuise N. Marak aro Samanda ni gitcham BDO Albert G. Momin ni dilanichi aro songni nokni manderang baksa ku·mong nangrime kam ka·anichi uaba Samanda Block na name kam ka·na man·gen ine parakaha.
Ia tom·anio Williamnagar ni MLA, East Garo Hills-ni ADC Albert G. Momin-ko dingtangmancha ia project-ko jako ra·e chu·sokatanina uko aro Samanda Block-o kam ka·gipa sakantikon mittelange, mongsonggipa sokgipa Thomas A. Sangma-ko ia dolongko aro Williamnagar jolo donggipa biaprangko namdapatna dingtang dingtang scheme aro tangka-paisarangko, skotong minister na janape on·anina ukoba mittelangaha.
Ia tom·anio, Marcuise N. Marak, sorkarini songni-nokni manderangni janggi tangani bewalrangko tang·doatna miksonge kam ka·arangni giminba jinmana agantalatangaha.
Mongsonggipa sokgipa ong·e Thomas A. Sangma aganengon, ua ia dolongko oprake on·na sokbana man·anina an·tangni kusi ong·aniko parake, ia indake dal·begipa project-ko chu·sokate on·a man·anira, sakgipin songrangna didiani ong·chongmotgen maina ia dolongko kana gita jinma ku·cholsan ong·esa iako chu·sokatna man·aha ine aganaha.
Ia Conrad Sangma-chi re·dilenggipa sorkari, mikkangchi nisanko done kam ka·gipa sorkari ong·a, da·alo manderangna nambate aro mikkangchide una bate nambate kam ka·na miksonganio ia sorkari kamrangko ka·enga ineba Thomas Sangma jinmana aganaha.
Ia dolongko oprake on·angani somoio dingtang dingtang skulni chatro-chatrirang manderangko an·saotna gita gitrangko ring·angaha aro chrok-mesaanirangkoba dakangaha.
Ia tom·anio, FOCUS Plus-ni gita adita sak manderangna Focus Plus-ni card-rangko mongsonggipa sokgipa aro gipin dilgiparangni jakchi sualangaha.
Tom·a matchotani ja·man, songni saksa ja·delgipako Hub News singon, ua ia dal·begipa dolongko man·anina an·tangni kusi ong·aniko parake, ian Simsang nalsachi donggipa song dam 14-ni manderangna bilongen dakchakbeani ong·gnok ine agane, Williamnagar-ni MLA Marcuise N. Marak aro Samanda Block- ni BDO Albert G. Momin-koba mittelataha.
