Shillong, May 19: Voice of the People Party (VPP)ni skotong dilgipa Pa Ardent Miller Basaiawmoit, re·baenggipa May -ni 23 tarikoni a·bachenge Shillong, Main Secretariat-ona napgipa cholgugao sima gri okgimu chake jingjengataniko dakna Sukrobar salo parakataha.

VPP dilgipani sima gri okgimu chake jingjengatna parakanganiara, Sukrobar salni bako Main Secretariat ning·o a·dokni pilak political dolrang baksa roster system-ko ra·gatani bidingo damsan asonge chanchirimanganio a·dok sorkarini chanchidilanganiko chu·ongnikgijani ja·man ong·aha.

Gimik political dolrang tom·e chanchirimani a·bachengachibara, a·dokni Job Reservation Policy-ni mamlako maming dangtapgija Roster system-ni gimin mangmang chanchiaiode asongeba namgni dongjawa inenba VPP dolni MLA-rang ong·katgrime kattokahachim.

Indake ong·engon, roster system aro job reservation policy-ni mamlako ra·chakna man·gijanirang dongengani gimin sorkarini kamrangna mande rim·ani kamrang gimikkon dondipatchengna gita sorkari parakatan baksa, roster system-ni gimin chu·gimikko che·em-che·em poraie niangna gita committee-ko songanggnikoba sorkari parakatjolaha.