New Delhi, Aug 5: Re·anggipa bilsini June jao, GoAir airlines-o airhostess-ni kamko ka·enggipa Nagaland a·dokni A·chik me·tra Rosy Sangma-ni siani bidingo Central Bureau of Investigation (CBI)-ni gita Gurugram-o donggipa private hospital-ni managing director aro dentist-ni kosako, sianggipa me·trana simsak nirokaniko on·jaha ine ijahar ka·doangaha.
Ia a·selni bidingo CBI-ni gita bilsisana ning·tue am·sandianirangko dakenba, ia hospital-ni managing director aro dentist-ni kosako re·anggipa Budbar salo FIR-ko segatangaha.
Koborko on·ani gitade, Gurugram-o donggipa Alfaa Health Care Hospital-ni managing director Dr Anuj Bishnoi aro hospital-ni dentist Dr Anjali Ashk-ni kosako Indian Penal Code-ni Section 304-A-ni ning·o CBI-ni gita mokordoma ka·aha.
Re·anggipa bilsio Rosy Sangma aro uni gritang Samuel Sangma-ni ong·na kragija bewalo siangani ja·man, Tura-ni MP Agatha K Sangma, a·dokni gitcham chief minister Mukul Sangma aro Meghalaya a·dokni Governor Satya Pal Malik-ko man·chape salgro salaram jolni dingtang dingtang dilgiparang, CBI inquiry-ko dakchina gita Union Home Minister Amit Shah-ko diditokahani gimin ia a·selni bidingo CBI inquiry-ko dakna gita Home Affairs Ministry ge·etaniko on·angahachim.
Ia a·selni bidingo Meghalaya a·dokni Chief Minister Conrad K Sangma-ba suk ong·gijaniko parakatahachim.
“Ia a·selni bidingo name am·sandie nion, Rosy Sangma, 2021 bilsini June 23 tariko ok re·ruruan baksana somoi nikani (period)-ni a·sel an·chi ong·rurue, uni jaksamgni aro jakrani ja·ao saknaaniko man·ahani gimin uko uni jonggipa sakgni aro uni gritang Samuel Sangma, June 24 tarik pring 6:00 bajio Gurgaon-ni Basai Road Sector 10-o donggipa Alfaa Health Care Hospital-ona ra·baahachim. Hospital-ona rimbaani ja·man hospital-ni managing director Dr Anuj Bishnoi aro dentist Dr Anjali Ashk, una name sanna bananirangko aro simsak nirokaniko on·jahani a·selsa ua siaha ine ma·sina man·aha,” ine ia doctor sakgnini kosako ka·anggipa FIR-o parakataha.
CBI-ni FIR-o parakangkuani gitade, Dr Anjali Ashk saksa dentist-sa ong·e gynaecology-ni kamrangko ma·sipagipa ong·jagenchimoba, an·chi pakrurue saenggipa Rosy Sangma-ko sanskaaha aro una unit bri an·chiko on·china aro gynaecologist-ni ku·pattianikoba ra·china gita see donangahachim.
Indake ong·genchimoba, konta dokni gisepo Rosy Sangma-ko sanna gita gynaecologist-ko okamatchipjaha aro konta bongana una an·chiko on·jahani a·selsa ua siaha ine CBI-ni FIR-o parakaha.
