Delhi, Jan 17: “Indiani silver girl” ine mingako man•pilgipa Saikhom Mirabai, Indiani sipairangko mande ra•na, uamangni bilakani aro ka•donganiko gisik ra•na New Delhio rikgipa nok ba National war memorialko nina re•angaha.

Kal•susaanio bak ra•nasan Delhiona re•baahaoba ianpakde Ia gisik ra•na krabegipa biapko nina sikbeaha, maina ia biapara Indiao songdongpaenggipa mande sakantini gisik ra•na krabegipa biap ong•chongmota, an•chingko chelchakenggipa sipairangni janggitangko on•kange a•songtangna kam ka•anganiko gisik ra•na aro mande ra•na krachongmota ine ua aganaha. Nokni ning•ao army, navy aro airforce rangko gisik ra•na dongipa biaprangko niroroe, pakmarango nitogipa noksarang, an•chingna ka•dongani aro uamangni on•kangani kamrangko gisik ra•atpilaniko on•chongmota ine ua janapjolaha.

Manipur a•dokni major Laishram Jyotin singh jean axsongo chubatgipa award ashok chakrako man•achim, unaba mande ra•anikoba dakjolaha.