Arunachal Pradesh, August 18: Upper Subansiri a•jani Kendriya Vidyalaya school-ni sak 9 me•chik bi•sarangni kosako kragija dakanirangna school-ko nirokna donatako man•gipa Principal-ko rim•aha.
A•selo ga•akgipa me•chik bi•sarangni ma•a-paatangtangna parakani ja•mano kragija dakani a•selrangko u•ina man•aha.
Uandake Principal-ni kosako badi ka•na section 354 IPC R/W 7 POCSO Act-o pangchake segataha aro dos dakgipa Akhileshwar Singh-ko Daporijo Police dol rim•aha ine Daporijo Police Station-ni OC Token Dubi parakataha.
A•selo ga•akgipa me•chik bi•sarangni parakanirangko niamo see jote ra•aniko dakaha aro iani kosako sandirikkitani kamrangko dakangkuenga ineba OC, Dubi talataha.
School-o skiani somoirango, me•chik bi•sarangni namnikgijani kosako kragija bewalo be•en bimangrangko dangtapaha ine bi•sarang paraktokaha.
School-o skienggipa saksani agan-skie on•aniko ja•rike me•chik bi•sarang noktangtangni manderangna a•sel ong•aniko paraktokaha ine Singh uiataha.
Uandake nokdangni manderangni a•sel ong•ani kosako Daporijo Police Station-o segatani ja•man Principal Singh-ko budbar salo rim•aha. A•selo ga•akgipa nokdangni manderang dos dakgipana raka sastiko on•china dabienga.
