Shillong, Jan 11: Meghalaya a⋅dokni Congress dolni skotong Pa Vincent H Pala, BJP aro NPP-chi rikenggipa MDA sorkari-na chakpaaniko on⋅enganina sakbonga MLA-rangko doloniko ra⋅galnaba donga ine aganaha. Congress dolni chu⋅bata gadangoni sakbonga MLA-rangko a⋅selrangko talatchina bi⋅an baksa maini gimin doloniko a⋅rikgalna nangjawa in⋅e sing⋅doaniko dakanggen ineba Pa Pala agandapaha.

MPCC-ni gita tom⋅anikoba ong⋅ataha aro uno sakbonga MLA-rangoni sakgni Pa Mohendro Rapsang aro Pa Mayralborn Syiem-de dongpaaha. Iani bidingo uamangna adita somoiko on⋅china bi⋅dapaha. Beben uamangko bichal ka⋅e rai on⋅a angni bilni nalsaosa unigimin anga ia mamlako AICC-ni jako pakwatenga. Da⋅al tom⋅anio chanchigiminrangkoba AICC-ona watatenga ineba Pa Pala talatdapaha.