Shillong, Dec 28: India aro Kazakhstan a•songni gisepo, a•songna chel•chakaniko on•na gita nangrime kamko ka•angna miksonge, sal 14-na ong•atanggipa ‘Exercise KazInd 2022’-ko Mongolbar salo, Ri Bhoi a•jani Umroi Cantonment-o donggipa Joint Training Node-o matchotataha.
Ia Exercise-ko ong•ataniara a•song damgnini gisepo meli-nangrimaniko aro nangrime kam ka•aniko bilakbatatani gitaba ong•aha.
Ia Exercise KazInd 2022-ko ong•atanichi, India aro Kazakhstan a•song damgnini sipairangan, namgipa skianirangko man•e da•o kamtangtangko ka•anion bida budirangko man•dapaha.
Skanggipa Indo-Kazakhstan Ex-ko 2016 bilsio 1/9 GR-ni gita Karagandy-o ong•atchengahachim aro uni ja•man 2017 bilsio Indian Army-ni gitcham COAS, Kazakhstan a•songona re•angskae, apsan nangrime kamko ka•na aro iandakgipa exercise-ko ong•atna sing•eskaahachim.
Uni ja•man changbongana iandakgipa KazInd exercise-rangko ong•ataha aro ia dolgnini exercise-ko company level exercise-ona ra•doataha.
