Tura, Jan 6: Re·anggipa Budbar attamo Assam a·dokni Salgipeng Salmara Mankachar districto gipa Kalapani joloniko pulis outpostni officialrangni sandirikitaniko dakengmitingo sakgni manderangko India a·songni Gong hajal 14 nokli tangkarang baksa rim·a man·aha.
Rim·a man·gipa manderangara bilsi 25 ong·gipa Hussein aro bilsi 24 ong·gipa Mufizul Mandal ong·a , uamangko rim·a tapan ning·tubate singsandianiko dakna gita joljol Kalapani police outpostona rim·baha ine police official saksa parakataha. Sriksrik koborrangko man·ani gitade uamang nokli Indian tangkako Bangladesh a·songniko ra·baengachim.
“Uamang sakgnikon chinga rim·aha aro nokli tangka rangko tarienggipa dol rang baksa bak dongna nanga ine chanchipenga ; sing·sandiani rangko matchotahaon pilakan parak ong·gen ineba janapdapaha.
