Tura, May 16: Tura jillani samba jolo donggipa Pelga Dare-ona milsi pena re•ange Bristibar attamo chio gimagipa mandeni manggisiko Robibar pringo, ia warini ka•maoniko man•pilaha.
West Garo Hills a•jani Superintendent of Police (SP) MGR Kumar-ni u•iatani gitade, ia bilsi 45 ong•gipa mandeni manggisiko salgittamna kingking Fire & Emergency service-ni sipairang, songni manderang baksa sandie Robibar pringo, Pelga Dare-oni kilometre atamang chel•ao donggipa, Banseng Wari aro Do•mesal Warini giseponiko man•pilaha.
Kobor on•timgiparangni u•iatani gitade, Tura-oni bilsi 45 ong•gipa John Ch Marak, Bristibar salo milsi pena gita Pelga Dare-ona re•angahachim indiba rasong grie ua unattamonin chio gimaahachim.
Bristibar attamonin songni manderang, police-rangni dakchakanichi uko chioniko sandiahaoba man•jaha aro uandaken salgittamni ja•manosa uni manggisiko Pelga Dare ka•maoniko man•pilaha.
Da•ororo mikkarang warongengani gimin Ganol chibimako man•chape Garo Hills-ni bang•bata chiringrang dal•baengahachim aro ia mandeko chi ta•rakbaenba man•pakangahakon ine police-rang chanchichipenga.
