Shillong, May 10: Meghalaya a•doko skanggipa changna West Jaintia Hills a•jani Laskein-o salgnina ong•atenggipa Lakadong Festival-o Meghalaya a•dokni Chief Minister Conrad K Sangma-ba bakko ra•angaha aro ia manianio Mookaiaw-ni MLA Nurjorki Sungoh, Agriculture & Famil Welfare-ni Commissioner & Secretary KN Kumar aro dingtang dingtang official-rangba bakko ra•angaha.
Ia tom•anio a•dokni Chief Minister, Lakadong holdiko ge•giparangna aganprakangengon, ia Lakadong Festival-ara, bilsibrina skang, Lakadong holdiko game ge•e cha•giparangni dingtang dingtang neng•nikanirangko namatna re•chakataniko bon•atani gita ong•enga ine parakangaha.
Meghalaya a•doko Lakadong holdi ge•e man•aniko bariatna gita ua somoion mission-ni bewalo kamko ka•chakatna sorkari tik ka•aha ineba Sangma parakataha.
Department-rangni gisepo ku•mong nangrime kam ka•ani dongjani a•sel bang•a changon nanga gita kamrangko chu•sokatna man•rongja ineba Sangma aganaha.
Game ge•e cha•enggiparangna training-rangko on•e, game ge•e man•anirangko bariatanichi game ge•e cha•enggiparangni man•gniko bariatanisa sorkario kam ka•enggiparangni nisan ong•na nanga ineba Chief Minister aganaha.
Meghalaya a•doko curcumin ba holdiko rong dakatgipa bostuko porikka ra•chakani biap dongani giminba ua an•tangni kusi ong•aniko parakataha.
Chief Minister-ni aganani gitade, curcumin-ko skangni somoirangode Kolkata-ona watatesa porikka ra•na nangani a•sel sal 10-mang somoiko nangrongachim indiba da•ode a•doktangon porikka ra•chakani biap dongahani gimin minute 10-mangsan nangskaaiahachim.
Mikkangchi ia apsan dakgipa program-ko a•doko game ge•e man•gipa bosturangnaba jakkalanggen ineba Chief Minister parakataha.
Iana skang a•dokni Chief Minister, dingtangmancha Turmeric Washer aro Polisher machine-rangko Meghalaya Farmers (Empowerment) Commission-ni seokgimin dolbri Lakadong Farming Society-rangna pakwate on•angaha aro Lakadong Mission-ni ning•o Collective Marketing Centre-rangkoba Thadmuthlong, Shangpung-o aro Laskein, Mowtryshiah-o kulie on•angjolaha.
