Arunachal Pradesh, April 12: April 12 tariko skanggipa changna India a·songo chu·gimik tarigipa sildoreng Donier 228, Assam Dibrugarh-oni Arunachal Pradesh-ni Pasighat-ona bilchakatchengaha.
Sak 17 asonge songrena man·gipa a·songtango tarigipa sildorengko Arunachalona bilatchengna man·ani rasong chabeani katta ong·chongmota ine Civil Aviation Minister Pa Jyotiraditya Scindia, Law and Justice Minister baksa do·ga oprake on·ani ja·man Tweeter-o seataha.
Alliance Air-an skanggipa changna India a·songtangko tarigipako bilchakatna dakchakaha aro ian Prime Minister Pa Narendra Modi-ni ja·ku ga·chakatgipa Atmanirbhar Bharat-na on·gilani bak ong·enga ineba Pa Scindia aganaha
Salgro salaram a·doko sildorengko bilatani tier 1 aro tier 2 dake bak dakatenga. Dibrugarh, Pasighat aro Lilabari rama gita April 18 tarikoni antio changgni dake bilrurugen ineba Alliance Air-ni coordinator Chirasree Sanyal aganaha.
Arunachal Pradesh-ni Skotong Minister Pa Pema Khandu Pasighat-oni bilchakatchengchina bara ripripe chin dake on·aha. Ian salgro salaram a·dokni tourism-o tang·dona dakchakbatani ong·gnok ineba Pa Khandu aganaha.
