Shillong, Dec 18: Robibar salo, a·songni Prime Minister Narendra Modi, mingchet ‘panchakani krongrangko’ salgro salaram a·dokrangna parakataha. Shillong songjinmao North Eastern Council (NEC)-ni bilsi 50 gapaniko manianio dongpae jinmana aganprakangengon, ua salgro salaram a·dokrangko a·gilsakna gam-jinrangko pattigipa ra·rongipa baksa toeba aganangaha.
Salgro salaram a·dokrango namroro silroroaniko ra·bana gita 1972 bilsio a·bachenggipa NEC-ni on·gilanirangna mittelpilangengon, NEC-ni bilsi 50 gapaniko manianiara a·songni jakgitelaniko man·aoni bilsi 75 gapaniko maniani baksa apsan ong·enga ine Prime Minister parakataha.
Salgro salaram jolni gamchatgipa ong·ani bidingo janapatengon, salgro salaram a·dokrangara South-East Asia-ona cholguga ong·ani gimin pilak jolrangon namroro silroroaniko ra·bana bijangchi gita ong·enga aro ia cholko ra·e sorkari, India-Myanmar-Thailand a·song damgittamko nangdimeatgipa rama baksana Agartala-Akhaura rel ramarangko tarina a·bachengatengaha ine PM Modi parakataha.
‘Look East’ policy-ko ‘Act East’ policy-ona dingtangataoni da·o sorkari, ‘Act Fast for Northeast’ aro ‘Act First for Northeast’ policy-ko ra·gatskaaha ineba Prime Minister parakataha.
Salgro salaram a·dokrangna mingchet pangchakani krongrangko parakatengon, salgro salaram a·dokrango tom·tomaniko ra·bana, bijolirangko nambate on·na, Tourism-ko tang·doatna, jatni daka rikanirangko tang·doatna, rama jal·langrangko nambatatna, 5G network-ko ra·bana, gama ge·ani kamrangko tang·doatna aro kal·susaanirangko namdapatna sorkari kam ka·enga ine PM Modi parakataha.
