Guwahati, July 11: Ma•mong sorkarini ra•gatgipa Agnipath scheme-ko a•songni dingtang dingtang biaprango jegaltokengon, salgro salaram a•dokrango aro mongsongbate Myanmar a•songni simao donggipa Arunchal Pradesh, Nagaland aro Manipur a•dokni songadam nokadamrango donggipa chadamberangna, Assam Rifle-ni sipairang, ia scheme-ni gimin agan-talate on•aniko dakna a•bachengataha.

Myanmar a•songni simao donggipa a•dokrang, je biaprangon bobil dake chakatgipa dolrang, bilake kamrangko ka•engkuachim, uandakgipa biaprango sipai dolrang, ia scheme-ni bidingo talate on•anirangko dakna a•bachengaha.

Sombar salo, Assam Rifles-ni Shamator Noklak Battalion, Agnipath scheme-ni gimin Nagaland a•dokni Noklak a•jao donggipa Chokla songo agan-talate on•angaha aro ia program-ko ong•atanio chadamberangsan ong•agija, songni dilgiparangba dongpae bak ra•angtokaha.

Iana skang, re•anggipa July-ni 8 aro 9 tarikrango, Assam Rifles-ni Khonsa Battalion, Tirap a•jani Lapnan songo donggipa chadamberangna aro ma•a paarangna ia scheme-ni gimin talataniko on•angskaenba, sipai dolrango nape a•song-chigatangko chel•chakchina chadamberangko didiangaha.