Shillong, Mar 31: Nagaland, Assam aro Manipur a·dokrango AFSPA-ko komiatna gita ma·mong sorkarini tik ka·anina Bristibar salo, Meghalaya a·dokni Chief Minister Conrad K Sangma mittelpilangenba, salgro salaram a·dokrango AFSPA-ko chu·gimik ra·galsrangchina gita ma·mong sorkariko didiangaha.

Salgro salaram a·dokrango songdongenggipa manderang ru·uta bilsirangonin AFSPA-ko ra·galchina dabitokengachim ine janapatengon, Nagaland, Assam aro Manipur a·dokrango AFSPA-ko komiataniara salgro salaram a·dokrango songdongenggipa manderangna ka·dongataniko ra·baani ong·gen ine Sangma parakataha.

Salgro salaram a·dokrango aro mongsongbate Nagaland, Assam aro Manipur a·dokrango da·o bobil dake chakatanirang komiangengahani gimin April 1 tarik dipet ia a·dok damgittamon AFSPA-ko komiatgnok ine Bristibar salo India sorkari parakatahachim.