Guwahati, Jan 2: Ia 2022 bilsiara salgro salaram a·dokrangna namgipa bilsi ong·gen maina ia bilsini gisepon BJP sorkarini dilanichi salgro salaram a·dokrango chagrongna nangenggipa dingtang dingtang neng·nikanirangko namatna man·gen ine Assam-ni Chief Minister aro North East Democratic Alliance (NEDA)-ni convenor Himanta Biswa Sarma parakataha.
Sarma-ni parakatani jabrini ja·man Assam a·doko Armed Forces (Special Powers) Act (AFSPA)-ko gital daktaiani somoi ong·engahani gimin AFSPA-ko ra·galna gita BJP sorkari, ta·raken kamko ka·na gita cholko ra·skagnok.
“Army-rang Assam a·dokko chu·gimik watangna siengaha aro da·o a·ja dambonga ba damdokrangosan dongaiaha. Uni gimin ia 2022 bilsini gisepon Assam-o AFSPA-ko ra·galna ja·ku de·na man·gnok,” ine Sarma aganaha.
Nagaland a·doko AFSPA-ko ra·galchina dabienggipani bidingo janapatskaengon, Nagaland a·doko AFSPA-ko ra·galna gita obostarangko nipiltaichina ma·mong sorkari, committee-ko songe on·aha aro sal 45-ni gisepon ia committee, report-ko on·na siengahani gimin namgipa koborko man·na ka·dongenga ine NEDA-ni convenor parakataha.
Batanggimin bilsirangni gisepon, a·songni Prime Minister Narendra Modi-ni dilanichi, Bru Refugees Settlement, Karbi Accord aro gital Bodo Accord gita dakgipa kamrangko BJP sorkari chu·sokatna man·ahani gimin Nagaland a·doko tom·tomanina ja·ku de·aniko chu·sokatna ka·dongenga ineba Sarma parakataha.
