Imphal, Feb 23: Prime Minister Narendra Modi-ni kamrangko ka•dilanichi salgro salaram a•dokrango bobil dake chakatgipa manderangoni sak 9,500-na baten an•tangtangko bame on•tokaha aro da•o Manipur a•dokosan ong•aigija salgro salaram jol gimikon tom•tomaniko man•piltaiengaha ine Budbar salo, Union Home Minister Amit Shah parakataha.
Budbar salo Union Home Minister, Manipur Assembly election-na Churachandpur aro Kangpokpi a•jarango manderangna aganprakangengon, Manipur a•doko bobil dake chakatenggipa Kuki dolrang baksaba sorkari agangrikgen aro uamangko tom•tomaona rimbapilna gita uamangni pilak neng•nikanirangko ta•raken namatna ka•dongenga ine parakangaha.
Shah-ni aganani gitade, Assam a•dokoba Bodo bobil dolrang baksa songgigrike Karbi Anglong a•jao bobil dake chakatenggipa bang•a manderangkon tom•tomaona rimbapilna man•aha aro da•ode ia biaprango chadamberang silchidarerangni pal laptop, karkanani chabirang, bike-rang aro garirangkosa ra•bitskaengaha.
BJP sorkariko rikani ja•man bilsi 45-ni gisepo skanggipa changna Manipur a•doko tom•tomaniko ra•bana man•aha ineba Union Home Minister parakataha.
Manipur a•doko bilsi 15-na Congress dolni sorkariko rikani gimin janapangengon, Manipur a•doko Congress dolni chu•sokgijanirangko Chief Minister N Biren Singh-ni dilanichi BJP sorkari, dingtangatna man•aha ine Shah parakataha.
Salgro salaram a•dokrango namroro silroroaniko ra•bana gita PM Modi-o nikjumanganirang gnangchim ine janapatengon, skang changrango gitcham prime minister-rang gita ong•gija Prime Minister Narendra Modi-de chang 40-na baten salgro salaram a•dokrangona re•baaha ine Union Home Minister parakataha.
India a•songni mingsinggipa boxer MC Mary Kom aro weightlifter Mirabai Chanu-ni chu•sokgipa ong•ani gimin janapatengon, Manipur a•doko a•songni skanggipa Sports University-ko kuliengaha aro Manipur a•dokan a•song gimikni kal•susachakram biap ong•gen ine Shah parakataha.
Ma•mong sorkarini ra•gatgipa PM-Kisan, Ayushman Bharat, Pradhan Mantri Awas Yojana aro uandakgipa scheme-rangni giminba ia tom•anirango Union Minister, jinmana talate on•angaha.
