Itanagar, Oct 19: Indita bilsirangna salgro salaram a•dokrango chagrongna nangenggipa neng•nikanirangko namatna gita da•o dipet pangkamgipa cholrang dongkujaenga indiba iandakgipa neng•nikanirangko namatna apsan chanchirimanirangko nangchongmota ine Mongolbar salo, National People’s Party (NPP)-ni national president aro Meghalaya a•dokni Chief Minister Conrad K Sangma parakataha.

‘Regional Aspiration, National Outlook’ ine pangchakaniko done NPP Arunachal unit-ni Itanagar-o tom•bimonganiko ong•atanio NPP-ni national president, ia kattarangko aganaha.

Sangma-ni aganani gitade, salgro salaram a•dokrango indita bilsirangna chagrongna nangenggipa neng•nikanirangko namatani bidingo chanchirimna gita cholko on•nasa ia tom•bimonganiko NPP ong•ataha.

Salgro salaram a•dokrango chagrongna nangenggipa ra•bianirangko namatna gita da•o dipet maming cholrang dongkujaenga aro ia tom•anioba maming cholrangko man•kujanaba gnang ineba ua aganaha.

Salgro salaram a•dokrango man•enggipa ra•biani aro neng•nikanirangko joltangni manderangan name ma•sikugijagiparang dongani giminsa iandakgipa neng•nikanirangni bidingo chanchirimna aro man•ode namatani cholrangkoba sandina gitasa ia tom•aniko ong•ataha ine NPP-ni national president parakataha.