Agartala, Sept 7: Salgro-salaramoni a·jatangni political dolrang baksa bakrime politicalo mikkangchi chu·sokgipa ong·na gita re·mikkanganio salgro-salaram a·jani regional political party-rangko ku·cholsan ong·aniona ra·bana gita united forum-ko songna miksonge, Assam Jatiya Parishad(AJP) aro Indigenous Progressive Regional Alliance (TIPRA) ia dolgni, mikkangchi ku·mongrime kamko ka·na gita mijal Mongolbar salo bakrimna tik ka·angaha.
Iako kobor ra·timgiparangna mijal Guwahatio agananganio, a·jatangni political dolni miksonganiko mikkangchi mangrakbatatna gita Pradyut Manikya Deb Barma-chi re·dilenggipa Indigenous Progressive Regional Alliance baksa bakrimna gita chinga tik ka·aha ine parakatan baksa, iani bidingo, salgro-salaramni pilak regional political dolrang baksa apsan asongrime agangrikani ja·man bon·kame tik ka·aniko chinga ru·utgijan parakatgen ineba AJP-ni padot Lurinjyoti Gogoi u·iatjolaha.
“Ru·uta bilsirangonin salgro-salaram a·dokrangni chong·mot songdongkamgipa jatrang cha·bokanirangko man·baenga iako darangan ma·sia aro a·songo chang 75-gipa a·songni jakgitelani salko manipilengoba salgro-salaram a·jolrangoni pilak songdongkamgipa jatrang a·songo nama gadangko man·pana aro an·tangtangko ma·siatna gita jotton ka·stapna nangengkuaniara namen rasong gribeani ong·a,” ineba Pa Gogoi agan-parakataha.
“Salgro-salaramo doltangko ja·dil su·ate mikkangchi mangrakdapatna miksongani gnang BJP dolni ong·gijagipa chanchianirang baksa sason ka·ani a·sel da·alo salgro-salram jolni manderang skimna nangtokengaha aro uani biterangkoba manderang niktokengaha. Jatsa-jatgipinko mitchigrikate bak ong·grikatna miksongani gnang BJP dolni manderang ‘Hindutva’-ko a·songo ra·gatna miksongenga aro iani a·selan bang·bea jatni dakbewal gita janggi tanganirang aro ku·sik agananirang gimaangtokenga ba gimana kenchaksoani dongenga ineba AJP-ni padot aganangkuaha.
Uni gimin pilakni gitan galchipako man·enggipa salgro-salaram a·jolni manderang mikkangchi a·joltangni political dolni re·mikkanganiko mangrakbatatna aro ku·mongrime kamko ka·angna gita ku·mikchetaniko dakenga ineba ua janapatjolaha.
