Tura, Sept 1: Farmer’s Collectivization for Upscaling Production & Marketing Systems (FOCUS) program-ko Budbar salo, East Garo Hills a·jani Samanda block-oba Meghalaya a·dokni Chief Minister Conrad K Sangma, a·bachengate on·angaha aro ia program-ko a·bachengate on·anio a·dok sorkarini Chief Whip Marcuise Marak-ba dongpae bak ra·angaha.
Game ge·e cha·giparangna tangka paisani gita aro dingtang dingtang cholrangchi dakchakanirangko on·na a·dok sorkarini a·bachengatgipa ia FOCUS program-ko Samanda block-ko a·bachengate on·anganio a·dokni Chief Minister, jinmana aganprakangengon, Meghalaya a·doko songdongenggipa manderangoni 70 percent-de game ge·e cha·giparangan ong·a indiba a·doko game ge·e cha·giparang, dingtang dingtang program-rangoniko chu·onga gita dakchakanirangko man·jaengani gimin sorkari, ia FOCUS program-ko a·bachengataha ine parakangaha.
Ia FOCUS program-ko a·bachengatanichi sorkari, game ge·e cha·giparangna pala sim·ani cholrangko on·e a·doko gama ge·ani kamrangko tang·doatna jotton ka·enga ineba Chief Minister aganaha.
Ia program-ni ning·o game ge·e cha·giparangko dingtangmancha ‘Producers Group’ ingipa dolo napate sorkari, tangka paisarangko on·e dakchakenga ineba Chief Minister parakataha.
“Game ge·e cha·gipa sakantian dingtang dingtang neng·nikanirangko chagrongna nangronga, uni gimin game ge·e cha·giparang, jemangan apsan dakgipa chanchianirang donge sorkarini dakchakanirangko nangengachim, uandakgipa game ge·e cha·giparangko chinga dolsan ong·ate ia scheme-ni namgnirangko ra·china okamenga,” ine Sangma aganaha.
Ia program-ni ning·o game ge·e cha·gipa mande sakantinan gong 5000 ka·e sorkari on·gen indiba uamang producers group ine bimingko segatna nanggen ine Chief Minister talataniko on·angaha.
Chief Minister-ni aganani gitade, ia program-ni ning·o game ge·e cha·enggiparangna sorkarini on·enggipa tangka paisarangara loan ong·ja indiba game ge·e cha·enggipa manderang, an·tangtangni gama ge·ani kamrangko namdapatna man·na gita sorkarini dakchake on·anisa ong·enga.
Ia program-na sorkari dingtangmancha gong kror 200-ko chamanaha aro ia tangka paisarangko adita bilsirangni gisepon jakkalgen ineba Sangma aganaha.
Meghalaya a·dok gimikon PRIME Hub-ko kulienga aro ia PRIME Hub-an game ge·e cha·giparangna dingtangmancha kamrangni bidingo skie on·anggen ineba Chief Minister parakataha.
Sorkarini dingtang dingtang program-rangoniko loan-rangko ra·e karkanarangko kulichina gitaba ua game ge·e cha·gipa aro bading chiwalgipa dolrangko didiangaha.
A·dok sorkario, bading chiwalaniko tang·doatani program mingsa gnang aro ia program-chi a·doko bading chiwalgiparangko tang·doatna sorkari kam ka·enga ineba Chief Minister aganaha.
Ia program-ko ong·atanio East Garo Hills a·jaoni dol 35 producers group-rangna Chief Minister-ni jakchi cheque-rangkoba suale on·angjolaha.
