Shillong, July 7: Meghalaya a•doko Saubhaya Scheme-ni gong kror 149 tangkarangko jakkalsreta ine CAG-ni interim report-ko songbadrangko see parakatani ja•man, ia matnanganiko CBI-chi am•sanchina gita Hynniewtrep Youth Council (HYC) dabienba Budbar salo, Meghalaya a•dokni Chief Minister Conrad K Sangma aro a•dokni Deputy Chief Minister Prestone Tynsong-na sedoataha.
HYC-ni general secretary Roy Synrem-ni parakatani gitade, Saubhagya Scheme-ara a•doko songdongenggipa manderangna aro mongsongbate kangal cholgrirangna bijolirangko sringe on•na gita ma•mong sorkarini ra•gatgipa scheme-sa ong•a aro ia scheme-ni tangka paisarangko jakkalsretaha ine songbadrango parakaniara namen kragijani ong•engani gimin kakketko ma•sina man•na gita ta•raken ia a•selni bidingo CBI-chi am•sandianirangko dakna nangenga.
Power department-o ong•gija dakanirangko aro Saubhagya Scheme-ni tangka paisarangko jakkalsretaha ine matnanganirangko jakgitele am•sandina man•na gita James Sangma-ko power minister ong•aoniko watchina gitaba HYC, a•dok sorkario dabiangaha.
Saubhagya Scheme-ni kamrangko Delhi-ni company-na on•ahani a•sel a•dokna gong kror 149.12 tangkarang noksan ong•na nangaha ine CAG-ni report-ko on•ani bidingo ‘The Shillong Times’ songbado see parakahachim ine nikna man•a.
