Tura, Aug 11: West Garo Hills a•jani Selsella block-ni ning•o donggipa Chambagre songo gital sub-centre-ko kulina gita Bristibar salo, Meghalaya a•dokni Chief Minister Conrad K Sangma, Selsella-ni MLA Ferlin Sangma, North Tura-ni MLA Thomas Sangma aro Williamnagar-ni MLA Marcuise Marak-ni mikkango, pangchakaniko songe on•angaha.
Ia sub centre-na pangchakaniko songe on•angani somoio a•dokni Chief Minister, jinmana aganprakangengon, da•o re•baenggipa bilsi gittamni gisepo dam 300 gital sub-centre-rangko a•doko kulina sienga ine parakangaha.
Meghalaya a•dokni pilak songadam nokadamrangon sanna bananirangko on•gipa biaprangko namdapatna gita sorkari dingtangmancha an•seng baljokani project-ko a•bachengataha ineba Chief Minister parakataha.
Chief Minister-ni parakatani gitade, a•doko gital sub-centre-rangko kulina gita sorkari, gong kror 165 tangkarangko chamataha.
Meghalaya Health Infrastructure Strengthening Project-ni ning•o a•dokni PHC aro CHC-rangko namdapatna gita gong kror 350 tangkarangko chamataha ineba Chief Minister parakataha.
