Tura, Aug 11: Bristibar salo, Meghalaya a•dokni Chief Minister Conrad K Sangma, West Garo Hills a•jani Selsella Block-ni ning•o donggipa Jongkipara Sub Centre-o salni bilchi chalaigipa dingtang dingtang kolrangko a•bachengate on•angaha aro ia kolrangko a•bachengate on•anganio Selsella-ni MLA Ferlin CA Sangma, North Tura-ni MLA Thomas A Sangma aro Williamnagar-ni MLA Marcuise N Marak-ba dongpae bak ra•angaha.
Songadam nokadamrango donggipa manderangna an•seng baljokaniko on•na man•na gita Meghalaya sorkari, dingtangmancha SELCO Foundation, Sauramandala Foundation, ChryptoRelief aro Sustain Plus Energy Foundation baksa nangrime, bi•sa ding•atani, light-rang, bangkarang, tika donchakanirang aro uandakgipa kolrangko salni bilchi chalaina gita Decentralized Renewable Energy-ko a•bachengatahachim.
Meghalaya a•dokni pilak health centre-rangon salni bilchi chalaigipa kolrangko chatanio da•o dipet gimik dam 187 health centre-rango iandakgipa kolrangko chatna man•aha aro uandaken da•o bangki dongkuenggipa dam 327 sub centre-rang aro dam 107 PHC-rangoba Solar Power ba salni bilchi chalaigipa kolrangko chatna gita a•dokni Chief Minister a•bachengate on•angaha.
Jongkipara sub-centre-o salni bilchi chalaigipa kolrangko a•bachengatanio a•dokni Chief Minister, jinmana aganprakengon, COVID-19 sajinmani somoio a•dok sorkari, iandake manderangna sanna bananirangko on•gipa biaprangko chalaianio neng•nikanirangko man•na nangahani gimin da•o a•dok gimikon sanchakram biaprangko namdapatna gita kam ka•engaha ine parakataha.
