Tura, Nov 09: A·doko skia-porani gadangko tang·doatna re·mikkange kamko ka·enganio, South Garo Hills-ni ning·o donggipa Karukol Higher Secondary School-o poraienggipa chatro-chatrirangna Science Stream-ko a·bachengate on·aniko Butbar salo, Rongara-Siju-ni MLA Pa Rakkam A Sangma parakate on·angaha.
Ia programo bakko ra·e jinmana aganprakatengon, joltangni MLA Pa Rakkam A Sangma, skulo Science Stream-ko man·ahanina an·tangni kusi ong·aniko parakangenba, pilak chatro-chatrirangkon mikkangchi songsalo aro mondolio daitoko ra·e kamrango dangdike on·na man·na gita science-na gisiko nangtokchina aro krenge poraichina dididianiko on·angaha.
Unbaksana, Pa Sangma, namgipa skigiparangan poraienggipa chatrorangko mikkangchina namgipa didianirangko on·na gita ama ine skigiparangnaba didianiko on·angenba, skulna science stream-ko man·ahanio mikkangchi iako nokdangantini gam-jin gita chane skulko tang·doatna gita bakrimanirangko on·chinaba sakantikon didiangjolaha.
Tom·ao bakko ra·pagipa Karukol Higher Sec. School-ko a·bachengdilgiparangoni saksa aro Capt. W. A Sangma Memorial Govt. College-ni lecturer ong·enggipa Pa Sengban G Momin, skulo poraienggipa bi·sarangna Science Stream-ko a·bachengate on·anganina an·tangni kusi ong·aniko parakan baksa, da·odipet ua skulo sakdok chatro-chatrirang admission-ko ra·tokaha aro iako re·anggipa adacemic session-oni a·bachengengaha ine parakataha.
Ia programo, MBOSE porikkako see nambata gadango chu·sokanggipa Karukol Higher Secondary School-ni chatro-chatriangna jolni MLA-ni jakchi gong hajal 5 tangkani Appreciate Award-rangko on·anga baksa, ia gitalgipa Science Stream-ko skulo chalaiania skulni Principal A K Dev Kumar-na tangka gong lak 5-koba pakwate on·angjolaha.
