Baghmara, April 8: Bristibar salo Siju-Rongara constituency-ni MLA Rakkam A Sangma-ba a•dokni Chief Minister Conrad K Sangma baksa South Garo Hills a•jani Baghmara aro Gasuapara jolrangona wenange, da•o April-ni 12 tariko ong•atenggipa GHADC election-o
NPP-ni candidate-rangko seokchina jolni manderangko didiangaha.
South Garo Hills a•jao dingtang dingtang namroro silroroatani kamrangko a•bachengatahani gimin ua a•dokni Chief Minister Conrad Sangma-koba mittelpile aganangaha.
“Bilsi 20 batpile galchipako man•gipa jol da•o NPP-chi dilenggipa sorkarini rama jal•langrang aro dingtang dingtang namroro silroroatani kamrangko a•bachengatahani a•sel namroro silrorona a•bachengengaha,” ine Siju-Rongara-ni MLA aganaha.
Rakkam Sangma-ni aganani gitade, galchipako man•batsranggipa Tura-Baghmara, Panda-Kanai, Ranikor-Moheskola aro gipin mongsonggipa ramarangko da•o tarina a•bachengaha aro ia ramarangko tarimanahaode ian South Garo Hills-nasan ong•aigija Garo Hills gimiknan namgni ong•gnok.
South Garo Hills a•jao lekka pora aro an•seng baljokani kamrangko namdapatna gita sorkari mongsonggipa project-rangko a•bachengatan baksana Balpakram aro Siju jolrango tourism-ko tang•doatna kamrangko a•bachengaha ineba Rakkam Sangma parakangaha.
Wagesik GHADC constituency-ni NPP candidate Bartholomew D Shira aro Siju GHADC constituency-ni NPP candidate Albiniush R Marak-ko seokchina gita jolni manderangko didiangengon, NPP-na pu•one da•o ong•enggipa sorkarina mande ra•pilskaaniko mesokchina gita Sangma didiangaha.
