Jowai, Nov 22: West Jaintia Hills-ni District Mission Management Unit, Amlarem C&RD Block-ni Block Development Officer baksa nangrime Amlarem, Enowel Hall Playground-o Amlarem C&RD Block-ni SHG-ni memborrangna Self-Help Group Mela (SHG) baksana Health Camp-ko Sombar salo ong·ataha.
Ia programara, re·baenggipa 2022 bilsini January 21 tariko Meghalaya a·dokko man·ani bilsi 50 ga·dapaniko gisik ra·e manianiko daknasienggipani bak ong·a.
SHG Mela-ko oprake on·ani ja·man a·dokni Home Minister Pa Lahkmen Rymbui-ni salni bako tom·bagipa manderangna aganprakangengon, ia programni gita an·tangtangon pilak chu·ongnikani dongna aro me·chikrangna ka·dongdapaniko on·na gita a·dokni me·chikrangko bil gnangatna sorkari miksongenga ine aganatan baksa, song-nokrango pilak me·chikrangni janggi tangani gadangko ra·dona SHG dolrangko bang·bate bikotchina gita me·chik dolna didianikoba on·angjolaha.
Unbaksana, a·doko game-ge·e cha·enggipa manderangna FOCUS program-ni gita uamangni man·anirangko bariatna sorkari dakchakanikoba on·enga ine ua u·iatkuaha.
A·doktangko man·ani bilsi 50-ko ga·dapenganio Meghalaya-o pilak namroro-silroroaniko ra·baani gimin mongsongbate, Amlarem Sub-Division-na ra·baani gimin minister-ni agananganio, dingtang dingtang a·barango jekai sana-bananio, rama-jal·ang kaanio aro lekka-porani gadangko on·anio sorkarini chu·sokatanirangkoba minister janapatjolaha.
Tom·a a·bachengo manderangko rimchaksoe agananganio, Amlarem Sub- Division-ni ning·o gimik ge 460 SHG-rang gnang ine Amlarem C&RD Block-ni Block Development Officer, Dr. D. Lyngdoh u·iatangaha.
Salni bako tom·ao dongpagipa West Jaintia Hills a·jani Deputy Commissioner Pa Garod LSN Dykes, Amlarem Sub-Division-ni Sub-Divisional Officer Pa Abhilash Baranwal, COO- Programme MSRLS-ni Pa R. Kynta aro gipinrangba ua somoio tom·bagiparangni mikkango aganangtokaha.
Programo, SHG-ni chu·gimik kamrango nambate dakgipa Best Performing Cadre-rangna aro tika su·anio 90 oni 100 percent-ona chu·sokgipa SHG-rang ba VO-rangna certificate-rangkoba on·angjolaha.
